Rodrygo Goes umusore w’imyaka 18 ukomoka mu gihugu cya Brazil ni imwe mu mpano zishimishije muri iki gihe kandi zirimo kuzamuka neza bitangaje. Uyu musore ukiri muto yaje gutangaza amagambo akomeye ubwo yavugaga ko yifuza kubaka amateka ye akareka kwitirirwa Neymar.
Rodrygo yahoze akinira ikipe y’abakiri bato ya Real Madrid ariko kubera ibitego yari amaze gutsindamo Zidane ntiyazuyaje kumushyira muri Real Madrid y’abakuru ku myaka 18 gusa y’amavuko. IKindi nuko uyu musore muto amaze guhamagarwa inshuro zigera kuri eshatu muri ekipe ye y’igihugu.
Rodrygo Yatangarije TV ya CBF ati:
“Kuva natangira umwuga wanjye muri Santos, banyitaga amazina akomeye nka Neymar mushya ndetse na Robinho mushya gusa buri gihe nagiraga umutwaro ukomeye nifuza kurinda ayo mazina akomeye banyitiriraga.
Gusa igihe kirageze ngo njyewe Rodrygo nubake amateka yanjye ndetse nzamure ishema ry’igihugu cyanjye mumazina yanjye.”
Rodrygo yakinnye imikino 80 mu ikipe ya mbere ya Santos mbere yo kubona amafaranga menshi yerekeza muri Real Madrid mu mpeshyi ya 2018 ubwo bamushyiraga imbere agera kuri miliyoni 40 z’amayero.
Akigera muri Espagne ntiyatinze kwigarurira imitima y’abafana ba Real kuko yahise atsinda Hat-Trick ubwo batsindaga Galatasaray ibitego 6-0 mu mikino ya Champions League.
Twandikire muri Comment ku kibazo, icyifuzo cyangwa se inyunganizi waba ufite ku makuru tukugejejeho hejuru, yasangize inshuti n’abavandimwe.
