Rutahizamu w’Umunya-Mali yamaze kwanga kuza muri Rayon bitewe nuko ibyo yasabaga atabihawe.
Nkuko ubuyobozi bwa Rayon Sports bwari bwabitangaje, Moussa Camara yagombaga kugera i Kigali aje gukinira iyi kipe yahoze anakinira muminsi kurangiraetse no gushyira umukono ku masezerano, gusa byaje kurangira ataje ngo kubera kubura itike y’indege imugeza mu Rwanda.
Urugendo rwo kuza mu Rwanda rwahise rwimurirwa tariki 2 Ugushyingo 2020 nubwo igihe yagombaga gufata indege byahuriranye n’uko yahise yandura icyorezo cya COVID-19 maze urugendo rwongera gusubikwa ku nshuro ya kabiri.
Nyuma y’uko Moussa Camara yakomeje kugenda asubika urugendo, byaje gutuma ikipe ya Rayon Sports ibona ko bizagorana kuba yayizamo, ihitamo gusinyisha rutahizamu w’Umunya-Nigeria witwa Sunday Oni Jimoh wakiniraga ikipe ya Abia Warriors kugirango aze gufasha iyi kipe mu mwaka utaha w’imikino.
Amakuru agera kuri IMIKINO yemeza ko impamvu nyamukuru yatumye Moussa Camara yanga kugaruka muri Rayon Sports aruko yasabaga ko yamwishyura mbere amafaranga yagombaga kumugura angana n’ibihumbi 12 by’Amadolari, nyamara iyi kipe yo ikamubwira ko izayamuha yamaze gusinya, bikaba byaje kurangira impande zombi zitumvikanye ngo abe yayigarukamo.
Moussa Camara yazamukiye mu ikipe ya AS Bamako y’iwabo mu mwaka wa 2012 ayikinira umwaka umwe, nyuma yo kuyivamo aza kwerekeza mu ikipe ya AS Kasserine ayimaramo imyaka itatu yose ayoboye ubusatirizi bw’iyi kipe.
Tariki 23 Kanama 2016, yasinyiye ikipe ya Rayon Sports amasezerano y’imyaka ibiri, maze Mu mwaka umwe yayikiniye ayitsindira ibitego 10 mu mikino 19, anayifasha kwegukana igikombe cya shampiyona cy’umwaka w’imikino wa 2016-2017.
Muri 2017 yaguzwe ibihumbi 50 by’Amadolari yerekeza muri Ismaily Sporting Club yo mu Misiri, ariko nayo aza kuyivamo yerekeza mu y’andi makipe arimo MO Bejaia yo muri Algeria, kuri ubu akaba amaze umwaka mu ikipe ya Sohar SC yo mu gihugu cya Oman.
