Umukandida ku mwanya wa perezida wa Barcelona, Victor Font, arashaka kureshya Pep Guardiola avuye mu mujyi wa Manchester City ndetse aniyemeza gukomeza Lionel Messi muri iyi kipe.
Ku wa kabiri, Josep Maria Bartomeu yeguye ku kuba perezida i Camp Nou, mbere y’amajwi yo kutizera ubuyobozi bwe, hamwe n’inama y’ubuyobozi yose.
Nyuma y’icyemezo cya Bartomeu cyo kubireka, byavuzwe ko amatora y’umukuru wa Barcelona azaba mu cyumweru cya kabiri muri Mutarama, Font akavuga ko ari umwe mu bambere bifuza kuyobora iyi ekipe.
Font w’imyaka 48, yatangaje ko aramutse atsinze amatora agomba kugarura Guardiola nk’umutoza mukuru, gushaka abandi bakinnyi bakomeye, kandi Messi ukomoka muri Arijantine nawe akaba yaguma muri Barca.
Guardiola yagiranye ibihe byiza na Barcelona hagati ya 2008 na 2012, yegukana LaLiga inshuro eshatu ndetse nigikombe cya Champions League inshuro ebyiri, ninayo mpamvu uyu mukandida avuga ko natorwa azamugarura ntakabuza.
Hagati aho, Messi, yari yatangaje ko yifuza kuva muri Barca muri Kanama gusa uyu mukandida font yavuze ko azakora igishoboka kugira ngo ahindure icyo cyemezo yafashe cyo kugenda nubwo n’ubusanzwe amasezerano ye azarangirana na shampiyona ya 2020-21.
