Mu gihugu cy’u Bwongereza, hasojwe shampiyona y’icyiciro cya mbere (Premier League), ikipe ya Liverpool yo yamaze kwegukana igikombe cya shampiyona, ariko nyuma y’igihe kinini, ikipe ya Manchester United yongera kubona umwanya mu makipe ane ya mbere.
Ku cyumweru tariki ya 26 Nyakanga 2020, nibwo mu gihugu cy’u Bwongereza, hakinwaga imikino ya nyuma ya shampiyona, aho hari hitezwe byinshi kuri uyu munsi wa 38, aho amakipe amwe yari ahanganiye kuza mu makipe ane ya mbere, andi ahanganiye kutamanuka mu cyiciro cya kabiri.
Kuri uwo munsi nibwo buri kipe muri Premier League, yuzuzaga imikino yayo uko ari 38, cyane ko ho ari wo mubare w’imikino bakina.
Inkuru nyamukuru iri muri iki gihugu cy’u Bwongereza, ni ukuba ikipe ya Manchester United yongeye kubona umwanya mu makipe ane ya mbere (Big 4), nyuma yo kuba iyi kipe yari yatangiye shampiyona nabi, itakaza imikino itandukanye.
Manchester United yabigezeho, nyuma yo gutsinda imikino igera kuri 18, bakanganya igera kuri 12, batsindwa imikino umunani 8, maze basoza bari ku mwanya wa gatatu n’amanota 66, banazigamye ibitego bigera kuri 30 mu mikino 38 bakinnye.
Ikipe ya Manchester United, yasoje shampiyona itsinda ikipe ya Leicester City ibitego 2-0, byatsinzwe na Bruno Fernandes kuri penaliti, ndetse na Jesse Lingard wari waje mu kibuga asimbuye ariko afasha ikipe ye gutahana amanota atatu.
Ikipe ya Chelsea itozwa na Frank Lampard, yasoje shampiyona iri ku mwanya wa kane n’amanota 66, ariko yon a Man U zigatandukanywa n’ibitego buri imwe izigamye kuko Man U yo izigamye byinshi, akaba ari yo mpamvu yaje ku mwanya wa gatatu.
Ahandi byari bikomeye, ku kipe yagombaga guherekeza Norwich FC ndetse na AFC Bournemouth, ariko byaje kurangira ikipe ya Watford FC izinyunzeho maze zimanuka mu cyiciro cya kabiri ari eshatu, mu gihe kugeza ubu ebyiri zimaze kumenyekana zizayasimbura ari Leeds United na West Bromwich Albion.
Bikaba bisobanuye ko, muri Europa League hazajya Leicester City, Tottenham n’ikipe izegukana Europa League hagati ya Arsenal na Chelsea, zombi zizakina umukino wa nyuma wa FA Cup tariki ya 01 Kanama 2020.
Rutahizamu wa Leicester City, Jamie Vardy, ni we wasoje ayoboye abatsinze ibitego byinshi na 23 mu gihe Pierre-Emerick Aubameyang wa Arsenal na Danny Ings wa Southampton, bombi batsinze 22.
Dore uk amakipe yatsindanye ku munsi wa nyuma wa Premier League
- Arsenal 3-2 Watford
- Burnley 1-2 Brighton & Hove Albion
- Chelsea 2-0 Wolverhampton Wanderers
- Crystal Palace 1-1 Tottenham Hotspur
- Everton 1-3 AFC Bournemouth
- Leicester City 0-2 Manchester United
- Manchester City 5-0 Norwich City
- Newcastle United 1-3 Liverpool
- Southampton 3-1 Sheffield United
- West Ham United 1-1 Aston Villa
