Ikipe ya Manchester United yemeje ko yamaze kumvikana n’ikipe ya Juventus yo mu Butaliyani kuba yagura Cristiano Ronaldo akagaruka Old Trafford aho kujya Etihad kwa Manchester City .
Ibinyujije ku mbuga zayo, iyi kipe yo mu mujyi wa Manchester yemeje ko yamaze kumvikana na Juventus kuba yagura Cristiano Ronaldo wari usigaje umwaka umwe muri iyi kipe akagaruka muri Manchester United yagezemo 2003 akayivamo 2009 agiye muri Real Madrid batandukanye 2018 ajya muri Juventus mu Butaliyani.
Si ibyo gusa, iyi kipe yanemeje ko n’ibirebana n’umukinnyi ku giti cye(Personal terms) bamaze kumvikana n’uyu rutahizamu ukomoka muri Portugal
Ibi byakurikiwe na post bahise bashyira ku rukuta rwabo rwa Twitter baha ikaze uyu mukinnyi wayihesheje igikombe cya Champions League cya 2008 ari nacyo iheruka, bivugwa ko yamutanzeho miliyoni 21 z’amapawundi.
Yerekeje muri Machester United mu gihe byavugwaga ko ari businyire ikipe ya Manchester City ari yo yamwifuje mbere.
Kuri uyu wa Gatanu tariki ya 27 Kanama 2021, uyu mukinnyi w’imyaka 36 yagiye ku kibuga cy’imyitozo cy’iyi kipe cya Continassa, akaba yahamaze isaha n’igice asezera abakinnyi mbere y’uko batangira imyitozo.
Uyu mukinnyi byavugwaga ko agiye kwerekeza muri Manchester City nk’uko Sky yabitangazaga ko umuhagarariye, Jorge Mendes yabwiye iyi kipe ko umukiriya we atakifuza gukinira Juventus.
Ariko amakuru avuga ko Man United ubwo yumvaga ko agiye kujya muri Man City ari bwo yahise ikora ibishoboka byose ngo imusubirane ariko ntajye mu bakeba.
Ronaldo yinjiye muri Juventus mu mwaka wa 2018 avuye muri Real Madrid kuri miliyoni 105 z’amapawundi, yayitsindiye ibitego 101 mu mikino 134, batwaranye ibikombe 2 bya shampiyona, igikombe cya Copa Italia ndetse na bibiri bya Super Cup.
