Cristiano Ronaldo yasezeye bagenzi be bakinanaga muri Juventus kuri uyu wa Gatanu tariki 27 ubwo bari mu myitozo bikaba bivugwa ko yerekeje muri Manchester City.
Uyu rutahizamu wari umaze imyaka itatu muri Juventus yo mu Butaliyani, nta gihe kinini gishize hatangajwe amakuru yo kuva muri iyi kipe.
Usanzwe akurikirana inyungu ze witwa Jorge Mendes aherutse kubwira Juventus ko atakifuza gukinira iyi kipe yari asigajemo umwaka umwe.
Yari yaje muri Juventus avuye muri Real Madrid aho yari yaguzwe miliyoni 105 z’amapawundi.
Mu myaka itatu yari ayimazemo, yayitsindiye ibitego 101 mu mikino 134, batwaranye ibikombe 2 bya shampiyona, igikombe cya Copa Italia ndetse na bibiri bya Super Cup.
Gusa nubwo bivugwa ko Manchester City yifuza uyu rutahizamu, ubuyobozi bwa Juventus butangaza ko butarakira ubusabe bw’iriya kipe yo mu Bwongereza.
Gusa amakuru yemeza ko Manchester City igomba kumusinyisha mbere y’uko isoko ryo kugura abakinnyi rifunga aho biteganyijwe ko rizafunga mu ntangiro z’icyumweru gitaha.
Bivugwa ko Manchester City yiteguye gusinyisha uyu mukinnyi amasezerano y’imyaka 2 aho azajya yishyurwa miliyoni 15 z’Amayero ku mwaka.
